रौतहट,२९ माघ ।। नेपाल सरकारले प्रस्तावित “मिडिया काउन्सिल र सामाजिक सञ्जाल विधेयक” खारेजीको माग गर्दै श्रमजीवी पत्रकार संघ, जिल्ला कार्य समिति रौतहटको आयोजनामा मौन जुलुस प्रदर्शन तथा ज्ञापन पत्र बुझाएका छन् ।
आज मधेसी क्रान्ति विपी चौक, गौरमा जिल्लाका सम्पूर्ण श्रमजीवी पत्रकारहरूको सहभागितामा सरकारको प्रेस दमन नीति विरुद्ध जुलुस प्रदर्शन गरी सचेत गराएका छन् । पत्रकारहरूले “मलाई लेख्न र बोल्न दे सरकार” “प्रेस स्वतन्त्र लाई कुण्ठित नगर सरकार” भन्ने नारासहित मौन जुलुस प्रदर्शन गर्दै प्रमुख जिल्ला अधिकारी (सीडीओ) मार्फत सम्बन्धित निकायलाई ज्ञापन पत्र बुझाएका छन् ।
श्रमजीवी पत्रकार संघका जिल्ला सचिव अभिमन्यु कुमार पटेल, अध्यक्ष संतोष पौडेल लगायतका संघका सदस्य सहित पत्रकारहरुको बाक्लो उपस्थितिमा सामाजिक सञ्जाल प्रयोगकर्तामाथि अंकुश लगाउने नियतले ल्याइएको विधेयक प्रेस तथा अभिव्यक्ति स्वतन्त्रताविरुद्धको कदम भएकाले तुरुन्त फिर्ता लिनुपर्ने माग राखी मौन जुलुस प्रदर्शन गरेका छन् ।
कार्यक्रममा विभिन्न सञ्चारमाध्यमका प्रतिनिधि, स्वतन्त्र पत्रकार तथा समाजिक अभियन्ताहरूको उल्लेखनीय उपस्थिति रहेको थियो । सहभागीहरूले विधेयक खारेज नभएसम्म चरणबद्ध संघर्ष जारी राख्ने चेतावनी समेत दिनुभयोका छन् ।
